ದೇಶಾದ್ಯಂತ ಗ್ಯಾಸ್ ಸಿಲಿಂಡರ್ಗಳಿಗೆ ಬೇಡಿಕೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಸರ್ಕಾರವು LPG ಸಂಪರ್ಕಗಳಿಗೆ ಸಂಬಂಧಿಸಿದ ನಿಯಮಗಳಲ್ಲಿ ತಿದ್ದುಪಡಿ ಮಾಡಿದೆ. ಅದರ ಪ್ರಮುಖ ಅಂಶವೆಂದರೆ ಆಧಾರ್ ಆಧಾರಿತ ಇ-KYC ಕಡ್ಡಾಯಗೊಳಿಸಲಾಗಿದೆ. ಈಗ ಎಲ್ಲಾ LPG ಬಳಕೆದಾರರು ಬಯೋಮೆಟ್ರಿಕ್ ಆಧಾರ್ ಪರಿಶೀಲನೆಗೆ ಒಳಪಡಬೇಕು. ಇ-KYC ಇಲ್ಲದೆ ಸಿಲಿಂಡರ್ಗಳನ್ನು ಬುಕ್ ಮಾಡುವುದು ಸಾಧ್ಯವಿಲ್ಲ.
ಗ್ಯಾಸ್ ಕೊರತೆ ಉಂಟಾಗುತ್ತಿರುವ ಸಂದರ್ಭದಲ್ಲಿ ನಕಲಿ ಸಂಪರ್ಕಗಳನ್ನು ರದ್ದುಪಡಿಸಲು ಹಾಗೂ ಕಾಳಸಂತೆ ಮಾರಾಟ ತಡೆಯಲು ಸರ್ಕಾರ ಈ ಕ್ರಮ ಕೈಗೊಂಡಿದೆ. ಕೆಲವರು ಸಿಲಿಂಡರ್ಗಳನ್ನು ದಾಸ್ತಾನು ಮಾಡುತ್ತಿರುವುದು ಪತ್ತೆಯಾದ ಹಿನ್ನೆಲೆಯಲ್ಲಿ, ಇ-KYC ಮೂಲಕ ನಿಜವಾದ ಬಳಕೆದಾರರನ್ನು ಗುರುತಿಸಿ ಸರಬರಾಜು ಸುಗಮಗೊಳಿಸುವ ಉದ್ದೇಶ ಸರ್ಕಾರದಾಗಿದೆ.
ಇ-KYC ಮಾಡಿಸಲು ಗ್ಯಾಸ್ ಏಜೆನ್ಸಿಗೆ ಭೇಟಿ ನೀಡಬೇಕಾಗಿಲ್ಲ. ಮೊಬೈಲ್ ಫೋನ್ ಮೂಲಕವೇ LPG ಆಧಾರ್ ಇ-KYC ಪೂರ್ಣಗೊಳಿಸಬಹುದು. ಮುಖ ಗುರುತಿನ ಪರಿಶೀಲನೆ ಅಥವಾ ಬಯೋಮೆಟ್ರಿಕ್ ದೃಢೀಕರಣದ ಮೂಲಕ ನಿಮ್ಮ ಗುರುತನ್ನು ಪರಿಶೀಲಿಸಲಾಗುತ್ತದೆ. ಈ ಪ್ರಕ್ರಿಯೆ ಯಶಸ್ವಿಯಾಗಿ ಪೂರ್ಣಗೊಂಡರೆ ಎಂದಿನಂತೆ ಸಿಲಿಂಡರ್ ಸಿಗುತ್ತದೆ ಮತ್ತು ಸಬ್ಸಿಡಿಯೂ ಲಭ್ಯವಾಗುತ್ತದೆ.
LPG e-KYC ಎಂದರೇನು? ಇದು ಆಧಾರ್ ಮೂಲಕ ನಿಮ್ಮ ಗುರುತನ್ನು ಡಿಜಿಟಲ್ ರೂಪದಲ್ಲಿ ದೃಢೀಕರಿಸುವ ಪ್ರಕ್ರಿಯೆ. ಆಧಾರ್ ಸಂಖ್ಯೆ ಹಾಗೂ ಮುಖ/ಬಯೋಮೆಟ್ರಿಕ್ ಪರಿಶೀಲನೆಯ ಮೂಲಕ ಗ್ಯಾಸ್ ಸಂಪರ್ಕವು ಸರಿಯಾದ ಹೆಸರಿನಲ್ಲಿದೆಯೇ ಎಂದು ಖಚಿತಪಡಿಸಲಾಗುತ್ತದೆ. ಇದರಿಂದ ಗ್ಯಾಸ್ ಕಂಪನಿಯ ದಾಖಲೆಗಳು ನವೀಕರಿಸಲ್ಪಡುತ್ತವೆ. ಪ್ರಕ್ರಿಯೆ ಸುಲಭ, ಉಚಿತ ಮತ್ತು ಕೆಲವೇ ನಿಮಿಷಗಳಲ್ಲಿ ಪೂರ್ಣಗೊಳ್ಳುತ್ತದೆ.
